Ensalada de feixóns negros

Unha dieta variada, na que estean presentes todos os grupos de alimentos, elaborados de distintas maneiras, asegúranos non só que a alimentación sexa equilibrada senón que evitamos ademais a monotonía na mesa. Esta ensalada é un exemplo de como sorprender os nosos familiares cun prato baseado en legumes, pois estamos a ofrecelos en forma de ensalada e non nun guiso, como se fai decote. Os feixóns proporcionan hidratos de carbono complexos e proteínas vexetais. O seu contido en graxa é escaso, así que se os tomamos en combinación con verduras ou cereais como o arroz, obtemos pratos saudables que poden incluírse na dieta de calquera persoa, tendo conta da ración de consumo. Os feixóns son moi ricos en fibra, necesaria para regular o tránsito intestinal, aínda que a algunhas persoas pode ocasionarlles problemas de flatulencia. Para evitar este inconveniente recoméndase cociñar os legumes con herbas dixestivas. O contido en minerais deste legume é excepcional e salientan sobre todo o potasio, o fósforo e mais o magnesio. As persoas que padecen insuficiencia renal deben ter en conta a elevada achega de potasio e fósforo, xa que son minerais que convén reducir na súa alimentación.