Sukaldaritzako produktu moldakorrenetako bat dugu hostorea eta ia edozer gauza prestatzeko erabili dezakegu masa zaporetsu eta magiko hori. Plater gaziak edo gozoak, hotzak edo beroak, kanapeak, gosegarriak, plater nagusiak, postreak… Hostoreak eskainitako aukerak amaigabeak dira. Osagai honekin zure Gabonetako menuetan asmatu egingo duzu! Probatu nahi duzu?

Familian janaria prestatzeko garai ezin hobea dira Gabonak: tartak, tartaletak, postreak, gosegarriak, kanapeak… Aukera mordoa eskaintzen dizkigu erabiltzeko prest datorren hostore-masak. Gainera, haurrekin batera forma eta plater dibertigarriak sortzeko osagai egokia da. Izugarri gustatuko zaie! Jarraian, hostorearen ezaugarri guztiak baliatzeko zenbait gomendio emango dizkizugu, zure irudimena erabilita, produktu honi etekinik handiena diezaiozun.

MASA MOTA

Masa bakoitzak modu ezberdinean erantzuten dio labearen beroari eta errezetaren arabera mota bat edo bestea izan daiteke egokiagoa. Gure dendetan, hostore mota hauek aurkituko dituzu:

• Brick. Masa gogorra da eta kontuz ibili behar gara ez lehortzeko. Bestela, manipulatzeko zaila izango da eta erraz apurtuko zaigu. Labean sartu edo zartagin batean erre dezakegu (koiperik gabe). Proba ezazu nahasketa gaziekin betetako zakutxoak edo “zapitxoak” egiten.
• Filo. Brick masaren oso antzekoa da. Laberatu ondoren, ore fin, kurruskari eta oso hauskorra lortuko dugu. Gaztarekin, oilasko zatiekin, salteatutako itsaskiekin eta beste hainbat osagairekin betetako paketetxoak egiteko erabili ohi da.
• Hostorea. Ur, koipe (gurina, txerri-gantza edo margarina) eta gatzarekin egiten da, masa behin eta berriro tolestuta, ondo bereizitako geruza finak lortzeko. Horrela, laberatutakoan, geruzak banan-banan egosiko dira eta testura bikaina lortuko dugu. Ezin hobea da opiltxoak, croissantak edo betetzeko tartak prestatzeko.

Proba ezazu Eroskiko gurindun hostore-masa, palma-koiperik eta partzialki hidrogenatutako landare-koiperik gabe.

Horiez gain, enpanada-masa, quiche edo tartaletak egiteko erabiltzen den masa hautsia edo brisa (bolumenik hartzen ez duena) edo pizza-masa aurkituko dituzu.

HOSTOREA MANIPULATZEKO GAKOAK

–Zabaldu masa gainazal lau batean. Normalean, masa paper batean bilduta etortzen da, baina, hala ere, jarri irin apur bat haren azpian, itsatsi ez dadin, masak bere tamaina handituko baitu zabaltzen duzunean.

-Erabili arrabol lau bat masa zabaltzeko. Masaren lodierak 3 mm-koa izan behar du, hautsi ez dadin.

–Ez ezazu inoiz masa oratu. Bestela, masa osatzen duten xafla ezberdinak hondatuko dituzu.

–Hainbat formako prestaketak egin ditzakezu: kanape moduko bilkariak (masa 2 cm-ko tiratan moztuta), saskitxoak (masa karratuetan moztuta), zirkuluak… Era berean, masa guztia bete eta xerratan moztu ditzakezu, edo forma dibertigarriak dituzten ebaketa-moldeak erabili. Ebaketa garbiak egiteko, erabili beti labana zorrotzak.

– #EROSKITRIKIMAILUA #ZERO HONDAKINA Baliatu soberan geratu diren ebakinak. Horretarako, pilatu ebakin guztiak eta elkarrekin jarrita dituzunean, tolestu liburu bat bezala eta zabaldu berriz arrabolarekin. Saskitxo gaziak, opilak edo palmeratxoak egiteko erabili ditzakezu.

LABERATU BAINO LEHEN

-Hostorea distiratsu eta pixka bat kurruskariago gera dadin, margotu arrautza edo gorringo irabiatuarekin labean sartu aurretik.

-Beste trikimailu ezagun bat da hostorearen gainean txitxirio gordinen puska bat jartzea, hostoreak gora egin ez dezan.

LABERATZEA

-Laberatu baino lehen, sartu masa hozkailuan 10 minutuz, uzkurtu ez dadin eta prestatu aurretik irmo egon dadin.

–Ez da beharrezkoa labeko erretilua koipeztatzea. Nahiko izango da ur hotzarekin bustitako pintzel batekin hezetzea.

-Egin hostorea su bizian, 200-220 gradu inguruko tenperaturan, tamaina handiko elaborazioetan izan ezik. Hostorea prest egongo da urre-kolorea hartu eta koipea askatzen hasten denean.

-Ez ezazu labea ireki hostorea egiten den bitartean. Bestela, bolumena eta hezetasuna galduko du.

HOSTOREA GABONETAN, HASIERAKO PLATERETIK AZKENBURUKORA!

• Anima zaitez hainbat formatako kanape edo vol-au-vent batzuk prestatzen. Ia edozer gauzarekin bete ahal izango dituzu: otarrainxka eta perretxikoekin, odoloste eta gazta arraspatuarekin, ziazerba eta izokinarekin, bakailaoarekin, barazkiekin, baratxuri-nahaskiarekin, perretxiko edo barrengorriekin, hummusarekin, anana eta york urdaiazpikoarekin, guakamolearekin, patearekin, ahate konfit eta sesamoarekin…

• Ausartu zara inoiz hostorearekin zure vol-au-ventak prestatzen? Zabaldu hostore-masa eta egin hiru edo lau zirkulu ebakitzaile handi batekin. Jarraian, ebakitzaile txikiago batekin, atera erdiko partea. Zirkulu eta eraztun batzuk lortuko ditugu. Margotu zirkulu handiak arrautzarekin, jarri eraztunak horien gainetik eta margotu berriz. Sardexka batekin, egin zulotxo batzuk zirkuluen erdian, masa gorantz igo ez dadin eta sartu itzazu labean 10-15 minutuz 200 gradutan, vol-au-ventek urre-kolorea hartu arte. Aldez aurretik prestatu eta azken unean bete ditzakezu!
• Eta hostorearekin eta urdaiazpikoarekin bildutako gari-zainzuriak egiten? Hostorea eta urdaiazpikoa tira finetan moztu besterik ez duzu, eta dagoeneko egositako eta xukatutako zainzuriak hostore eta urdaiazpiko tirekin bildu. Margotu zainzuriak arrautzarekin eta hautseztatu sesamo-hazi batzuk horien gainetik. Azkenik sartu labean 15 minutuz 180 gradutan edo kurruskari geratu arte.

• Era berean, begiratu Gabon hauetan ahate-bloke ezberdin bat mahaian jartzeko ideia hau.

• Plater nagusi moduan, Wellington azpizuna egin dezakezu (azpizunarekin, txalotekin, barrengorriekin eta foierekin betetako hostore-masa), edo aukera beganoren bat prestatu, hala nola, ziazerba, perretxiko eta fruitu lehorrez betetako hostorea.

• Eta bukatzeko, zer deritzozu sagar eta hostoreko lore batzuk prestatzeari? Hostore-xafla bakoitza lau tira luzetan moztu beharko duzu, eta zuritutako eta ilargierdi formako xerra finetan moztutako sagarrak arrautzarekin margotutako hostore-tira bakoitzaren gainean jarri. Kontua da sagarren atal kurbatua agerian geratzea. Tolestu eta bildu hostorearen ertzetako bat, eman lore-forma eta jarri gurin apur batekin bustitako cupcake-moldeetan. Bota azukre pixka bat gainetik eta laberatu 180 gradutan 30 minutuz.

• Ikusten duzunez, oso erraza da hostore-masarekin errezetak egitea. Funtsezko gomendio batzuk gogoan izanez eta irudimen apur batekin, Gabonetarako errezeta eder eta oso erakargarriak lortuko dituzu. Gabon zoriontsuak opa dizkizugu!