Arroz integralarekin paella egiteko modu bat baino gehiago daude, baita ohiko paella egiten den denbora berdinean egiteko ere.

Arroz integrala egiteko denbora eta ur gehiago behar da, ohiko arroz zuriarekin baino. Kontu handiagoa ere behar da: gehiegi egosiz gero, trinkotuta, azala joanda eta apurtuta geratuko zaigu; eta gutxiegi egosiz gero, gogorregia egongo da. Izan ere, arrozaren ale integralak gaineko azala limatu gabe izaten du eta gogorragoa izaten da. Beraz, sutan gehiago eduki beharko da edo aurrez uretan eduki, lekaleak bezala. Berezitasun honen ondorioz, askotan ez da jaten, eta paella egiteko oso gutxitan erabiltzen da. Baina egin daiteke, oso erraza da eta modu batera baino gehiagotara egin daiteke. Jarraian paella integrala egiteko hiru modu daude.

Arroz integralarekin paella egiteko hiru modu daude. Denen helburua berdina den arren, metodoak desberdinak dira. Modu bat edo bestea aukeratu, sukaldari bakoitzaren pazientziaren eta gustuaren arabera egongo da.

1. Paella integrala betiko denborekin

Arroz zuriarekin ohiko denboran (18 minutu) egin nahi bada paella integrala, arroz integrala beratzen jarri behar da, alea apur bat hidratatuta egon dadin egosterako.

Arroz integrala sei orduz ur hotzetan edukiko dugu ontzi batean. Sei orduak igarotakoan, ura kenduko diogu eta ehundura desberdina duela ikusiko dugu: puztuagoa egongo da, eta arroz ez integrala bezala prestatu ahal izango dugu ia-ia. Horrelakoetan, azalik gabeko arroza bezala prestatuko dugu paella. Frijitukia prestatuko dugu, ura kendutako arroz integrala botako diogu frijituki horri eta arroza baino bi aldiz salda gehiago. Egosketa kontrolatua izango da eta irakin goxokoa (handiegia izanez gero, suak arroz alea apurtu egin dezake eta trinkotuta geratu daiteke). 18 minutuz egosi ondoren, arrozaren puntuari begiratu beharko diogu. Apur bat gogorra bada, salda apur bat gehiago botako diogu eta beste bost minutuz egiten utziko dugu. Prest dagoenean, sutatik kendu eta sukaldeko trapu batekin estaliko dugu, egonean dagoela egiten amaitu dadin.

2. Paella integrala betiko teknikarekin

Arroz integrala beratzen eduki nahi ez bada eta paella modu “tradizionalean” egin nahi bada, denbora gehiago beharko dugu. Gutxienez 40 minutu beharko ditu egosteko, beste arrozen bikoitza. Gainera, salda edo ur gehiago beharko dugu. Arrozaren bolumen hirukoitza beharko dugu (arroz katilukada bakoitzeko, hiru katilukada salda).

Gainerakoa berdina izango da: barazkiak arin frijituko ditugu, arroz integrala bota eta frijituekin sueztituko dugu, paellari arroz integrala baino hiru aldiz ur gehiago botako diogu, gatza bota eta 40 minutuz goxo irakiten utziko dugu. Garrantzitsua da gogoan izatea egiteko denbora hau ez dela zehatza, arroz markaren araberakoa, ereinda daraman denboraren araberakoa… izaten da. Beraz, 40 minutu izan ordez 45 izan daitezke eta ur edo salda gehiago behar. Egosten amaitutakoan, sutatik kendu, sukaldeko zapi batekin estali eta bost minutuz egonean utziko dugu, mahaira atera aurretik.

3. Paella integral expresa

Paella azkar egiteko ere prestatu daiteke arroz integrala. Aurrez arroza egostea da kontua (entsalada edo goarnizio baterako bezala).

Horretarako, arroza bera bakarrik egosiko dugu lapiko batean ur askorekin eta gatz pixka batekin, italiar pasta egosterakoan bezala. 45 minutuz egosiko digu (edo 10 minutuz, presio-eltzea erabiliz gero). Egositakoan, ur hotzetan pasako dugu, ura kentzearekin batera hoztu dadin. Arroz integrala egosi eta hoztutakoan solte eta urik gabe dagoenean, paellaren frijitukia prestatuko dugu osagaiak erabat egin daitezen (barazkiak, oilaskoa, arraina, itsaskiak…). Orduan botako dugu arroz integrala ura kenduta (aurreko egunetik eginda izan dezakegu, adibidez) eta salda botako diogu (arrozaren erdia, hau da, arroz katilukada bakoitzeko salda katilukada erdi). Dena hiru minutuz egingo dugu su ertain-handian, paellaren salda agortu arte, eta gainerako paellak bezala bukatuko dugu: sutatik kendu, sukaldeko zapi batekin estali eta bost minutuz egonean utziko dugu mahaira atera aurretik.

Trikimailua: zapia lapikoaren gainean

Arroz integralaren paella modu batera edo bestera egin arren, denetan zapia jartzen da lapikoaren gainean (ohiko taparen ordez), egonean dagoenean. Horrela, paella ez da hozten eta arroz ez da hondatzen. Ohiko tapa bat jarriz gero, kondentsazioa egongo litzateke, hezetasuna ur-tanta bihurtuko litzateke taparen barruan eta paellaren gainera eroriko lirateke tanta horiek. Ondorioz, arroza gehiegi bigunduko litzateke eta paellaren esentzia kendu: arroz lehorren erreginak ez du saldarik izaten prestatu ondoren eta arrozaren alea bere puntuan egoten da, lehor eta solte.