Tempura de verduras con mel

Coa axuda dun pelador partimos as cenorias en tiras e logo cocémolas brevemente en auga fervendo con sal, ata que estean al dente (cocidas pero lixeiramente crúas por dentro); finalmente, escorrémolas nun coador pasándoas pola billa da auga fría e reservámolas. Por separado, cada unha na súa cazola, cocemos o resto das verduras con auga salgada a ferver, ata deixalas al dente. Escorrémolas como fixemos coa cenoria e reservamos tamén. Colocamos a fariña nun amplo recipiente con auga moi fría e formamos unha crema homoxénea. Pasamos a clara de ovo por un batedor eléctrico. Mesturamos con coidado a clara e o engrudo de auga con fariña e poñemos a punto de sal. Na mestura resultante introducimos as cenorias, o brócoli, a cabaciña e os feixóns verdes. Facemos moreíñas pequenas e friximos de poucas en poucas verduras, nun cazo con aceite de oliva quente. Necesitamos que o cazo teña profundidade para facer unha fritada, como se fose unha frixideira pero en pequeno. Unha vez frixidas estas moreíñas de verduras, sacámolas a unha bandexa con papel de cociña, para que elimine o exceso de aceite da fritada. Servimos chantadas en pequenos espetos, acompañadas dun prebe agridoce de mel. Para elaborar este prebe mesturamos nun bol a mostaza antiga, mel, ketchup, oito gramos de prebe de soia e sal afumado, remexemos e formamos un aderezo untuoso, ideal para un entrante de picar.